.. من أوِّل طلقة حبر فـِ الهوا
انقطعت حبال الرجا
واتدحرجت راس الخيال من فوق الجبلايه
وانزوت الحكايات فـِ بطن البحر
وغرقوا الغطَّاسين !
..............................................
من زمان والنور غِلِس !
قطعوا دراعاته .. طلعت له عيون
قطعوا لسانه .. فضلت غنوته
قطعوا راسه .. مانطفاش
وفِضِل يلفّ دواير على روس الأنبيا والقدِّيسين
ويطلَّع لهم لسانه .. المقطوع !
..............................................
فـِ لحظه مسمومه
اتكوِّمت النقط ع الحروف
واتعجن الكلام فـِ صفوف طويله
آخرتها الحرق !
..............................................
على كل حال
واقفه العصافير تشكي قُصر العمر
وكُتر الفخاخ
وطول الطريق م العش .. للقش
وبالعكس !
..............................................
بروح واحده
تعمل مُقايضه مع الشيطان
وبروحين تشتريه شخصيًا
وبسبع ترواح
تبقى مش محتاجُه طبعًا !
..............................................
- عن مين الحلقه دي ؟
- عن دمّ مالوهش صاحب
- ومنين راح نبتدي ؟
- من آخر نبض صاخب
- ياسيدي !
..............................................
لحد ماتبان الحقيقه
ح تفضل البيبان على عهدها
والأفكار بتفرّ فـِ الكتب ..
ولحد مايترفع القلم
ح يفضل الشعرا متبِّتين فـِ الميكروفونات
وميِّتين ع المجاز !
ولحد ماتنكسر شوكة الوقت
ح تفضل الساعات بتجرح
والأيام بتشرح
والسنين بتخيَّط الجروح !
..............................................
السبت 20 أغسطس 2011
نشرت هذه القصيدة في العدد الأول من جريدة "الكل" بتاريخ 4 سبتمبر 2011
اللوحة أكبر لوحة فسيفساء في الشرق وجدت في قصر هشام شمال مدينة أريحا
جميلة جدا .. عجبني قوي النور الغلس اللي مش راضي يموت و فينالة السنين اللي بتخيط الجروح
ردحذفشكرا ليك ياجيمي .. سعيد جدا إنها عجبتك
ردحذف