الاثنين، 17 ديسمبر، 2007

ودوده


ما تقولش لنفسك إيه الحل
اتحلل من وعدك ليها
وارفس خيالاتها بهمجيه
لو لزم الأمر
................
لو أمكن تطردها و بشويش
ح يكون أفضل
علشان ما تقولش عليك حيوان وغبي وانسان عالم تالت
بـدّل مواعيدك ومكانك
ورقم تليفونك وجرايدك
عطرك وامواسك ومرايتك
ماركة أقلامك وصحابك
والقهوه اللي بتقعد فيها بشكل روتيني
غيـّــر أغانيك
جـرّب تكتب شعرك بالطول أو سمبوكسات
ثبــّت فـ عينيك نظره جديده
تدهشها وتنغــّص عيشها
فكر فـ ازاي ممكن تحذفها من التكوين
من غير ماتخربش فـ الألوان
عارف - صدّقني - الموضوع صعب
لكن مش صعب انك تبدأ
ماانتش أول مخلوق مخنوق
لكن أول مخلوق مخنوق
ممكن يتفك

28/8/1998

نشرت في كتاب الورشة الصادر عن أتيلييه الإسكندرية 2001
اللوحة للفنان "رينيه ماجريت"

الخميس، 13 ديسمبر، 2007

عفريت العلبه







من قلب الحدوته الفارغه
عفريت العلبه بيتنطط
عيــّل زقطط
لمــّا انكسرت لعبة غيره
وافترش المشهد شيء مشبوه
يمكن من أبوه
ولا من أمه
لمـّا ابتدوا عزف على النوته
بالليل وسابـــوه
بيشرّح جسم البنُّوته
وبيدهن جسمه بزيت الشعر
ويقف عريان تحت المطره
يستعرض فـ تاريخه السرّي
ويقلـّب فـ الكتب الصفرا
ويشطـّب على كل الثورات المنحرفه
من أول طرده من الجنه
ومروراً بخروجه على الوزن
ولغاية رفضه لأكل الكوسه المطبوخه
وأما بتخلص آخر كتبه
بيقف فارغ ووحيـــد وعبيــــط
يمضغ مستيكته لحد ماتخلص حلاوتها
يضحك.. يرميها ويتمطـّع
يدخل فـ العلبه ويستنّى
أول واحد جاي يفتحها
2/4/1997
نشرت في كتاب الورشة الصادر عن أتيلييه الإسكندرية 2001
اللوحة للفنان "رينيه ماجريت"