الأول
لما بتشتد عليه الأزمه
بيجرب تكتيك الكتكوت
ويحاول يحفر فـ البيضه
سكه من الباطن
!ما بيعرفش
فبتاخد منه البيضه
تخبطها فـ بوز الترابيزه
وياخدها صاحبنا بحزن شديد
واذا قربت شويه ودققت
ح تشوف ـ تقريبًا ـ دمعه بتتمرجح فـ عينيه
( لأنه ماكانش عايزها بكل الشروخ دي )
وأخيرًا
يبكي
التاني
عايش على هامش أحلامه
كل كلامه
عن تفكيك النص الشعري
ومحاولة تأويل الثابت والمتحول
بيخلي صحابه على القهوه
ياخدوه مادة لضحك السهره
لكن لما بيدخل وياهم فـ حوار الطاوله المفتوحه
أو تضاريس البت الطالعه من الدكان
بيحس قد إيه هو خـ ..فـ .. يــــــــــــف
وأخيرًا
يضحك ..
يضحك ..
التالت
مأساته الحقيقيه
!!إن اللي بيتكلم جواه أخرس هو كمان
فتلاقي الصمت محاوطه فـ كل الأحوال
مع نفسه
مع غيره
ومعاها
طبعًا بمرور الوقت اتعلم
إزاي ح يحرك فـ شفايفه
ويطلع أصوات مفهومه
لكن لما بيلقى إن ردود الناس
مالهاش أي علاقه بردُّه
بتترسم على وشه خلطه عجيبه من الدهشه
و
اليأس
وأخيرًا
يسكت
21/7/2000
نشرت في كتاب الورشة الصادر عن أتيلييه الإسكندرية 2001
بورتريه الشاعر للفنان "علي عاشور"
بورتريه الشاعر للفنان "علي عاشور"
جميل يابو يحيي
ردحذفبس يا تري هم دول كل الختيارات المتاحة بس؟؟؟
اوعي تقول لي اتصل بصديق
انت عارف الخطوط كلها بتعطل فجأة
والله يا بسكوته قريب خالص الاختيارات ح تزيد بس انت لاحقي
ردحذف